मुंबई : फिटनेस आणि समाजसेवेचा सुंदर संगम घडवणारी इस्कॉन फूड फॉर लाइफ (ISKCON Food for Life) आयोजित ‘Run2Feed’ हाफ मॅरेथॉन 8 फेब्रुवारी रोजी उत्साहात पार पडली. तब्बल 2,500 हून अधिक धावपटूंनी या उपक्रमात सहभाग घेत ‘कोणीही उपाशी राहू नये’ हा मानवतेचा संदेश देत शहरातील रस्ते अक्षरशः जिवंत केले.
ही मॅरेथॉन केवळ क्रीडा स्पर्धा नसून सामाजिक बांधिलकीची चळवळ ठरली. व्यावसायिक धावपटू, युवक, महिला, ज्येष्ठ नागरिक, लहान मुलांसह संपूर्ण कुटुंबांनी उत्साहाने धाव घेत या उपक्रमाला साथ दिली. प्रत्येक पावलामागे गरजूंसाठी अन्नदानाचा संकल्प असल्याने सहभागींच्या चेहऱ्यावर वेगळाच आनंद आणि समाधान दिसून येत होते.
इस्कॉन फूड फॉर लाइफच्या वतीने राबविण्यात येणाऱ्या अन्नवाटप मोहिमेला या उपक्रमामुळे मोठी चालना मिळाली आहे. मॅरेथॉनमधून जमा झालेल्या निधीचा उपयोग गरजू, निराधार, वंचित कुटुंबे तसेच विद्यार्थ्यांना पौष्टिक अन्न पुरविण्यासाठी केला जाणार आहे. या कार्यक्रमामुळे हजारो लोकांमध्ये भूकमुक्त समाजाचा संदेश पोहोचवण्यात यश मिळाले.
कार्यक्रमस्थळी स्वयंसेवकांनी शिस्तबद्ध नियोजन केले होते. वैद्यकीय सुविधा, पाण्याची व्यवस्था, ऊर्जा पेये तसेच सुरक्षा यामुळे स्पर्धा सुरक्षित आणि आनंददायी ठरली. धावपटूंना प्रोत्साहन देण्यासाठी सांस्कृतिक कार्यक्रम आणि प्रेरणादायी घोषणांनी वातावरण भारावून गेले.
आयोजक ब्रजेश पांडे यांनी सांगितले की, “Run2Feed हा आमच्या संस्थेसाठी आतापर्यंतचा सर्वात मोठा उपक्रम ठरला आहे. समाजातील प्रत्येक घटकाने दिलेल्या पाठिंब्यामुळे ‘Food for All’ हे आमचे स्वप्न अधिक बळकट झाले आहे. या माध्यमातून आम्ही अधिकाधिक लोकांपर्यंत अन्नसेवा पोहोचवू शकू.”
या उपक्रमाने फिटनेससोबतच सामाजिक उत्तरदायित्वाची जाणीव निर्माण केली असून, पुढील वर्षी अधिक मोठ्या प्रमाणावर हा उपक्रम आयोजित करण्याचा संस्थेचा मानस आहे. ‘धावूया आरोग्यासाठी आणि अन्नदानासाठी’ हा संदेश या मॅरेथॉनमधून प्रभावीपणे समाजात पोहोचला.
