पुणे : स्वतःच्या हक्काच्या घराचे स्वप्न पाहणाऱ्या हजारो पुणेकरांसाठी मोठी आनंदाची बातमी समोर आली आहे. मागील अनेक महिन्यांपासून विविध प्रशासकीय आणि निवडणुकीच्या कारणांमुळे रखडलेली म्हाडा पुणे लॉटरी 2026 अखेर १० फेब्रुवारी २०२६ रोजी जाहीर होणार आहे. या घोषणेमुळे तब्बल दोन लाखांहून अधिक अर्जदारांचा जीव भांड्यात पडला असून आता ‘नशिबाचा कौल’ मिळण्याची उत्सुकता शिगेला पोहोचली आहे.
म्हाडा पुणे मंडळाकडून एकूण ४ हजार १८६ घरांची सोडत काढली जाणार असून, या घरांसाठी तब्बल २ लाख १५ हजार नागरिकांनी अर्ज दाखल केले आहेत. त्यामुळे स्पर्धा प्रचंड वाढली असून प्रत्येक घरासाठी जवळपास ५० हून अधिक अर्जदार रांगेत आहेत.
महानगरपालिका निवडणुका, त्यानंतरची जिल्हा परिषद आचारसंहिता आणि काही तांत्रिक अडचणी यांमुळे ही सोडत वारंवार पुढे ढकलण्यात आली होती. परिणामी अर्जदारांमध्ये नाराजी आणि संभ्रमाचे वातावरण निर्माण झाले होते. अनेकांनी घराच्या स्वप्नासाठी अनामत रक्कम भरण्यासाठी कर्ज किंवा क्रेडिट कार्डचा आधार घेतला होता. त्यामुळे सोडत लांबल्याने त्यांना व्याजाचा आर्थिक भुर्दंड सहन करावा लागला.
विशेष म्हणजे, अर्जदारांकडून जमा झालेली तब्बल ४४७ कोटी रुपयांची अनामत रक्कम गेल्या पाच महिन्यांपासून म्हाडाच्या खात्यात पडून होती. या प्रचंड निधीमुळेही सोडतीबाबत लवकर निर्णय घ्यावा, अशी मागणी सातत्याने होत होती.
या योजनेअंतर्गत २० टक्के सर्वसमावेशक गृहनिर्माण योजना आणि १५ टक्के एकात्मिक योजनेतील घरे विक्रीसाठी उपलब्ध करून देण्यात आली आहेत. सप्टेंबर महिन्यात नोंदणी आणि अर्ज प्रक्रिया सुरू झाली होती. सुरुवातीला अपेक्षेप्रमाणे प्रतिसाद न मिळाल्याने मुदतवाढ देण्यात आली. नंतर अर्जांची संख्या झपाट्याने वाढल्याने म्हाडाकडे मोठा प्रतिसाद मिळाला.
आता १० फेब्रुवारी रोजी ऑनलाइन सोडत प्रक्रिया पारदर्शक पद्धतीने पार पडणार असून, अर्जदारांना थेट निकाल पाहता येणार आहे. घर मिळालेल्यांना पुढील कागदपत्रांची पूर्तता आणि ताबा प्रक्रियेची माहिती स्वतंत्रपणे देण्यात येणार आहे.
पुण्यात वाढत्या घरांच्या किमती आणि भाड्याच्या दरांमुळे सर्वसामान्यांसाठी स्वतःचे घर घेणे कठीण झाले आहे. अशा परिस्थितीत म्हाडाची ही योजना मध्यमवर्गीय आणि आर्थिकदृष्ट्या दुर्बल घटकांसाठी मोठा दिलासा ठरत आहे.
सोडतीच्या दिवशी अनेक कुटुंबांच्या स्वप्नांना नवी दिशा मिळणार असून, पुणेकरांसाठी हा दिवस खऱ्या अर्थाने ‘घरकुलाचा उत्सव’ ठरणार आहे.
