पुणेकरांसाठी मोठी बातमी! वर्षातील १५ दिवस मध्यरात्रीपर्यंत ध्वनीक्षेपकांना परवानगी

पुणे : पुणेकरांसाठी उत्सव साजरे करण्यासंदर्भात महत्त्वाचा निर्णय जिल्हा प्रशासनाने घेतला आहे. केंद्र शासनाच्या ध्वनी प्रदूषण (नियमन व नियंत्रण) सुधारित नियम २०१७ अंतर्गत जिल्ह्यातील नागरिकांना वर्षातील निवडक १५ दिवस सकाळी ६ ते रात्री १२ वाजेपर्यंत ध्वनीक्षेपक आणि ध्वनीवर्धक वापरण्याची विशेष परवानगी देण्यात आली आहे. यासंदर्भात जिल्हाधिकारी जितेंद्र डुडी यांनी अधिकृत आदेश जारी केला आहे.

या निर्णयामुळे धार्मिक, सांस्कृतिक आणि सामाजिक कार्यक्रमांना मोठा दिलासा मिळणार असून अनेक उत्सव अधिक उत्साहात साजरे करता येणार आहेत. विशेषतः मिरवणुका, भजन-कीर्तन, सांस्कृतिक कार्यक्रम, आरत्या आणि सार्वजनिक सोहळ्यांना रात्री उशिरापर्यंत परवानगी मिळणार असल्याने नागरिकांमध्ये समाधान व्यक्त होत आहे.

परवानगी असलेले प्रमुख दिवस

• शिवजयंती – १९ फेब्रुवारी

• डॉ. बाबासाहेब आंबेडकर जयंती – १४ एप्रिल

• महाराष्ट्र दिन – १ मे

• गणपती उत्सव, ईद ए मिलाद व अनंत चतुर्दशी – १९, २०, २२, २३, २४, २५ सप्टेंबर

• नवरात्री उत्सव – १९ व २० ऑक्टोबर

• ख्रिसमस (नाताळ) – २५ डिसेंबर

• वर्षाअखेर – ३१ डिसेंबर

• विशेष कार्यक्रमांसाठी – २ राखीव दिवस

 अटी व नियम

प्रशासनाने स्पष्ट केले आहे की, ध्वनी पातळी ही झोननिहाय ठरवलेल्या मर्यादेतच ठेवावी. शांतता क्षेत्रे (रुग्णालये, शाळा, न्यायालय परिसर) याठिकाणी ही सूट लागू राहणार नाही. नियमांचे उल्लंघन केल्यास कायदेशीर कारवाई केली जाईल.

तसेच आयोजकांनी पोलीस व स्थानिक प्रशासनाची पूर्वपरवानगी घेणे बंधनकारक असून ध्वनीप्रदूषणामुळे नागरिकांना त्रास होणार नाही याची खबरदारी घेण्याचे आवाहन करण्यात आले आहे.

 नागरिकांमध्ये उत्साह

या निर्णयामुळे पुण्यातील सार्वजनिक गणेशोत्सव मंडळे, सांस्कृतिक संस्था, सामाजिक संघटना आणि विविध धार्मिक समित्यांनी समाधान व्यक्त केले आहे. “उत्सवांची परंपरा जपत प्रशासनाने घेतलेला हा निर्णय स्वागतार्ह आहे,” अशी प्रतिक्रिया अनेक मंडळांकडून देण्यात आली.

जिल्हाधिकारी डुडी यांनी नागरिकांना नियमांचे काटेकोर पालन करून प्रशासनाला सहकार्य करण्याचे आवाहन केले आहे.