महाराष्ट्रातील जलवाहतूक क्षेत्राला जागतिक दर्जाचे तंत्रज्ञान आणि विदेशी गुंतवणुकीची जोड देण्याच्या दृष्टीने आज मंत्रालयात महत्त्वपूर्ण बैठक पार पडली. स्वीडनस्थित अत्याधुनिक हायड्रोफॉईल तंत्रज्ञान विकसित करणाऱ्या Candela कंपनीच्या वरिष्ठ प्रतिनिधींसमवेत राज्य शासनाने सविस्तर चर्चा केली.
हायड्रोफॉईल तंत्रज्ञानावर आधारित विद्युत चालित जलवाहतूक बोटींच्या संभाव्य करारासंदर्भात या बैठकीत विविध मुद्द्यांवर सकारात्मक संवाद झाला. समुद्र, खाडी आणि अंतर्गत जलमार्गांवर वेगवान, पर्यावरणपूरक आणि ऊर्जा-कार्यक्षम जलवाहतूक सेवा सुरू करण्याच्या दृष्टीने या तंत्रज्ञानाचा अभ्यास करण्यात येत आहे.
या बैठकीला कँडेला कंपनीचे संस्थापक आणि मुख्य कार्यकारी अधिकारी गुस्ताव हासेल्सकोग, चीफ कमर्शियल ऑफिसर नकुल विराट, इक्लाइन फायनान्सचे वित्त संचालक अंशुल दवानी तसेच रुलर एनहान्सर्स ग्रुपचे व्यवस्थापकीय संचालक अंबर आयदे उपस्थित होते. राज्य शासनातील वरिष्ठ अधिकारी आणि संबंधित विभागांचे प्रतिनिधीही चर्चेत सहभागी झाले होते.
हायड्रोफॉईल तंत्रज्ञानामुळे बोट पाण्याच्या पृष्ठभागावरून उंचावत प्रवास करते, ज्यामुळे इंधनाचा वापर कमी होतो, आवाज व प्रदूषण घटते आणि प्रवास अधिक सुरळीत व वेगवान होतो. मुंबई, ठाणे, नवी मुंबई तसेच कोकण किनारपट्टीवरील जलवाहतुकीसाठी हे तंत्रज्ञान क्रांतिकारी ठरू शकते, असा विश्वास बैठकीत व्यक्त करण्यात आला.
विदेशी थेट गुंतवणुकीच्या (FDI) माध्यमातून राज्यात उत्पादन युनिट उभारण्याबाबत, स्थानिक युवकांसाठी रोजगारनिर्मिती, कौशल्यविकास आणि ‘मेक इन महाराष्ट्र’ संकल्पनेला चालना देण्याबाबतही चर्चा झाली. यामुळे राज्यात हरित वाहतूक क्षेत्रात मोठ्या प्रमाणावर उद्योगसंधी निर्माण होण्याची शक्यता वर्तविण्यात येत आहे.
राज्य शासनाने जलवाहतूक क्षेत्रात तांत्रिक आधुनिकीकरणाला प्राधान्य देत शाश्वत आणि पर्यावरणपूरक विकासाचा मार्ग स्वीकारला आहे. या अनुषंगाने स्वीडनसारख्या प्रगत देशातील तंत्रज्ञान कंपन्यांसोबतची भागीदारी महाराष्ट्राला जागतिक पातळीवर स्पर्धात्मक बनवेल, असा विश्वास व्यक्त करण्यात आला. ही बैठक महाराष्ट्राच्या पायाभूत सुविधा विकासाच्या दृष्टीने एक महत्त्वाचा टप्पा मानली जात असून, लवकरच यासंदर्भात पुढील कार्यवाही आणि औपचारिक करार प्रक्रियेला गती मिळण्याची शक्यता आहे.
