पुणे (प्रतिनिधी) : पुणेकरांचा मेट्रो प्रवास अधिक सुलभ आणि सोयीस्कर करण्याच्या दृष्टीने महत्त्वाचे पाऊल उचलण्यात आले आहे. मुख्यमंत्री देवेंद्र फडणवीस यांच्या हस्ते पुणे मेट्रो आणि पुणे आयटी सिटी मेट्रो रेल लिमिटेड (PITCMRL) च्या लाईन-३ साठी एकात्मिक डिजिटल तिकीट प्रणालीचा शुभारंभ करण्यात आला. या सुविधेमुळे प्रवाशांना एकाच मोबाईल ॲपद्वारे दोन्ही मेट्रो सेवांचे तिकीट बुक करता येणार आहे.
यापूर्वी वेगवेगळ्या मेट्रो सेवांसाठी स्वतंत्र तिकीट व्यवस्था वापरावी लागत होती. मात्र, नव्या प्रणालीमुळे तिकीट बुकिंगची प्रक्रिया अधिक सोपी होणार असून प्रवाशांचा वेळ आणि श्रम वाचण्यास मदत होईल. विशेषतः हिंजवडी आयटी पार्क, बाणेर, बालेवाडी आणि शिवाजीनगर परिसरात नियमित प्रवास करणाऱ्या नोकरदार, विद्यार्थी आणि नागरिकांना या सुविधेचा लाभ मिळण्याची अपेक्षा आहे.
पुणे मेट्रोच्या विद्यमान मार्गिका आणि हिंजवडी-शिवाजीनगर मेट्रो लाईन-३ यांच्यातील प्रवासासाठी एकाच डिजिटल प्लॅटफॉर्मचा वापर करता येणार असल्याने सार्वजनिक वाहतुकीची जोडणी अधिक सुलभ होईल. भविष्यात पुण्यातील एकात्मिक सार्वजनिक वाहतूक व्यवस्थेला अधिक बळ मिळण्याच्या दृष्टीनेही हा महत्त्वाचा उपक्रम ठरणार आहे.
या कार्यक्रमाला उपमुख्यमंत्री एकनाथ शिंदे, उपमुख्यमंत्री सुनेत्रा अजित पवार, केंद्रीय राज्यमंत्री मुरलीधर मोहोळ, राज्यमंत्री माधुरी मिसाळ, पुण्याच्या महापौर मंजुषा नागपुरे तसेच इतर मान्यवर उपस्थित होते.
डिजिटल सुविधेमुळे मेट्रो प्रवासाला नवी दिशा
शहरातील वाढती वाहतूक कोंडी, प्रवासाचा वेळ आणि खासगी वाहनांवरील अवलंबित्व कमी करण्यासाठी मेट्रो सेवा महत्त्वाची ठरत आहे. आता एकात्मिक डिजिटल तिकीट प्रणालीमुळे प्रवाशांना अधिक सुलभ पद्धतीने मेट्रोचा वापर करता येणार असून पुण्याच्या आधुनिक आणि डिजिटल वाहतूक व्यवस्थेला नवी चालना मिळणार आहे.
